又係時候研究下Asiamiles點駛

沖繩自駕遊2016 - 2017 準備篇 & 飛行里數篇

20.12.2016

經過上次出發前兩日先買貴酒店貴機票嘅高雄之旅，今年聖誕我決定洗心革面，提早計劃行程。今年聖誕打算去沖繩跳島之旅，先致電到去位於北角英皇道嘅沖繩觀光會議局預約拿資料。

但唔知係唔係因為日本企業奉行JIT (just in time)工商管理，book車,早3個月先有，book酒店要6個月內,book機票 Peach, HK Express, 同華航都未出石垣冬季機票，所以冇得搞住。既然「尋一點開心，為什麼雖要等？」，所以多了時間鑽研信用卡亞洲萬里通積分點用先至抵！分分鐘可以好像上次曼谷之旅咁樣，用晒啲Asiamiles , Accor A+ 同Hotels.com 積分。

經過屋企部超級奔騰雙核心電腦-Travel Go運算，再經過微軟耗資過億圓開發嘅數據分析軟件系統-Excel 計算之後，得出以下結論：
(PS: 我唔係小斯,唔係教大家點換積分，只係自己睇完一輪有以下結論同大家分享下)
1.一樣二萬分冇理由唔搭多轉！
原來香港《》沖繩 + 沖繩《》石垣，同原來香港《》沖繩，都係二萬積分，所以其實望多兩眼可以去多個地方。

但係用asiamiles 係唔可以搭JAL 單程。由於我計劃的行程是香港>石垣>宮古>那霸>香港，如果冇單程買，就用多好多時間飛蒞飛去，雖然唔駛錢但有啲戆居咁囉。
2. 「I can fly one day！」
Asiamiles其實係唔係「將飛留俾關羽」呢?真係要問問關公定公關點解成日都冇飛!我五月睇定十二月都冇飛。都冇唔知諸葛亮幫唔幫到我呢（依個gag蒞架！）所以Asiamiles 其實唔駛真係咁好駛，大時大節冇得駛。依加咁多張Credit Card可以儲分，咁多張卡爭果幾張飛，所以應該係時候諗下轉會。

3.「與你同遊幾千公里」
喂！老老實實，「與你同遊幾千公里」其實唔係得Asiamiles囉。
姐係咁，有張大新英國航空白金卡可以儲British Airways 積分，一樣所有one world航空公司都用得。如果我今次沖繩之旅不走回頭路，即係要買單程啦! Asiamiles單程香港飛沖繩要15000分，但係BA 7500分就得，平Asiamiles 一半。

之後亦都研究左石垣<>宮古+>石垣<>那霸經Asiamiles搭日本航空JAL旗下琉球空中通勤 (RAC ）15000分搞掂，但BA show唔到JAL附屬航空公司的機票。

於是,又研究埋JAL Mileage Bank 。Asiamiles 同British Airways Executive Club都冇JAL 單程買，只係得JAL有得用自己的積分換單程國內線。於是又睇埋張AEON Card JAL。
結論係，好似轉儲大新英國航空白金卡好似好啲，但係又於大新卡好多簽帳都唔包，所以可以KEEP多一張credit card 儲下cash dollar。而JAL張AEON card $8 一分唔係好抵。
( HK /Overseas)per mile
AEON Card JAL $8 / $8
大新英國航空白金卡 $6 / $4
國泰航空尊尚信用卡 $6 / $4
渣打亞洲萬里通萬事達卡 $6 / $4
國泰航空信用卡 $8 / 5.3
4.「但要走，總要飛」
計完一輪，都係買機票好似好啲。

之後又研究埋，積分轉移大法! 但其實One World 積分係唔可以互換，上埋Points.com睇,都係唔得。
但係就喺我失望之際，竟然BA係有得買積分! 可以用190USD ( HK$2600) 買15000 Avois 。個分可以換兩張港龍香港飛沖繩，重平過買張機票!第時去旅行又有多一個地方格價。